Судағы қауіпсіздік ережелерин сақтау!

Суға түсу маусымы ресми түрде 1 маусымнан басталды. Бірақ, кейбір адамдар суға түсу маусымы басталмай-ақ суға түсуді әдетке айналдырып отыр. Осыған байланысты су айдындарында шомылатындардың да саны арта түсетіні кәміл. Жыл сайын суға түсуге болмайтын жерлерге суға түсу оқиғалары көбейіп отыр. Жағажайлардың суға түсуге қолайлығы тексеріліп, содан кейін барып, ашылуға дайындайды. Өзен асты сүңгуіршілердің көмегімен бақыланып қаралады. Қаралғаннан соң барып, жағажайды қолданысқа беру немесе бермеу туралы шешім шығару қажет. Суға түсуге болатын жағажайлардың өзінде де түнгі мезгілде суға түсуге болмайды.
Жағажайда дәрігерлер мен құтқарушылар кезекшілікте болса да, арнайы қалқымалармен де суға түсуге болмайды. Бұдан бөлек мас күйінде суға түсетін адамдар да құтқарушыларды әбігерге түсіріп қоятыны бар. Жағада спирттік ішімдіктер ішу тек қана өзіне ғана зиян әкелмейді, сонымен бірге қоршаған ортаға да залал келтіреді. Суға лақтырылған, сынған бөтелкелер судағы басқа да адамдардың жарақаттануына немесе бақытсыз жағдайға ұшырауына әкеп соғады. Жаздың күні балық аулайтындарға су айдындары қауіпті саналады. Балықшылардың өздерінің жеке құтқарушы құралдары, құтқару көкірекшесі немесе шеңберлері болуы керек.
Судағы демалыс – әсіресе жаздың күндері демалыстың ең бір керемет түрі. Балалар мен ересектер үшін катерде, қайықта серуендеу керемет ләззат әкеледі. Алайда, демалыс орны толмас қайғылы оқиғаға да душар етуі мүмкін. Судағы қауіпсіздік ережесі талаптары ескерілмегендіктен, қайғылы жағдай немесе адам өлімі орын алуы да әбден мүмкін екендігін естен шығармау керек.
Бақытсыз жағдайлар көбінесе суға түсу қауіпсіздік ережесі талаптарын сақтамағандықтан болып жатады. Соңғы жылдардағы оқиғаларды талдағанда судағы адам қазасы төмендегі жағдайларға байланысты орын алып жатады:
- суға жүзуді білмегендіктен;
-жабдықталмаған су айдындарында шомылу, судағы қорқыныштан және жылдам ағыстан;
- алкогольдік ішімдік ішіп немесе басқа заттар қолданып, мастықпен суға түсуден;
- құтқару құралдарын қолдану тәртібін бұзудан;
- навигациялық ережелерді бұзғандықтан және тағы басқалардан.
Балалар мен ересектердің қаза болуының басты себептері – суға жүзуді білмеу және судағы қауіпсіздік ережелері талаптарын сақтамаудан. Әсіресе, балаларды су жағасына үлкендердің қарауынсыз қалдырып кетуінен. Сәби абайсызда сүрініп немесе құлап қалып-ақ, жәй ғана шалшық суға да тұншығып қалуы мүмкін.
Барлық судағы іс-шаралардың қатысушылары су айдындарында қауіпсіздік шаралары мен ережелері талаптарын мүлтіксіз сақтауы керек. Адамның ең бір ізгі міндеттерінің бірі - суда жүзе білуді өзінің үйренуі және қоршаған ортадағы басқа адамдардың да суда дұрыс жүзуге дағдылануына үлес қоса білуі.

Зайсан ауданының ТЖБ аға инженері
азаматтық қорғау майоры Р. Баймурзин